fbpx

అంగన్వాడీలు సమ్మె విరమించండి : రాష్ట్ర ప్రభుత్వం విజ్ఞప్తి

Share the content

వైయస్ జగన్మోహన్ రెడ్డి ప్రభుత్వం అన్నివర్గాల వారిదిని, ఈ 55 నెలల కాలంలో మనసున్న ప్రభుత్వంగా పాలన సాగించామని, గత 17 రోజులుగా అంగన్వాడీలు చేస్తున్న సమ్మె ను విరమించుకోవాలని రాష్ట్ర ప్రభుత్వం విజ్ఞప్తి చేసింది. ఈ మేరకు గురువారం ఒక ప్రకటన విడుదల చేసింది. అంగన్వాడీల న్యాయమైన కోర్కెలన్నీ ప్రభుత్వం పరిష్కరించడానికి కృత నిశ్చయంతో ఉందని తెలిపారు. మీరు చేస్తున్న సమ్మె కారణంగా బాలింతలు, గర్భిణీ స్త్రీలు, పసిపిల్లలు పౌష్టికాహారం అందక ఇబ్బందులు పడుతున్న విషయాన్ని సహృదయంతో అర్ధం చేసుకోవాలని తెలిపారు. ప్రభుత్వానికి ప్రజా సంక్షేమమే ప్రధమ కర్తవ్యమని, అందులోనూ గర్భిణులు, బాలింతలు, చిన్నపిల్లలు మీద మరింత శ్రద్ధ తీసుకోవాల్సిన బాధ్యత ప్రభుత్వం మీద ఉందన్నారు. ఈ నేపథ్యంలో వీరి క్షేమం దృష్ట్వా ప్రభుత్వం ప్రత్యామ్నాయ ఏర్పాట్లను చేయాల్సిన పరిస్థితిని తీసుకురావద్దని విజ్ఞప్తి చేస్తున్నామన్నారు. ఈ వర్గాల వారి ప్రయోజనాలను దృష్టిలో ఉంచుకొని సమ్మెను విరమించాలని విజ్ఞప్తి చేస్తున్నామని పేర్కొన్నారు.

అంగన్వాడీ లకు గత ప్రభుత్వంలో రెండేళ్లపాటు ఒక్క పైసా కూడా వారికి జీతాలు పెంచలేదన్నారు.గత ప్రభుత్వం 2016 ఏప్రిల్ 4న అంగన్ వాడీ వర్కర్ల జీతం రూ.4,200 నుంచి, రూ.7,000కు, మినీ అంగన్వాడీ వర్కర్ల జీతాలు రూ.2,950 నుంచి రూ.4,500కు, అంగన్వాడీ హెల్పర్ల జీతాలు రూ.2,200 నుంచి రూ. 4,500కు మాత్రమే పెంచిందని వెల్లడించారు. ప్రతిపక్షనేతగా 2017లో పాదయాత్ర చేస్తున్న జగన్మోహన్ రెడ్డి అంగన్వాడీ ల సమస్యలను చూసి మీ జీతాలు పెంచుతామంటూ హామీ ఇచ్చారన్నారు. దీంతో అప్పటి ప్రభుత్వం మేల్కొని, ఎన్నికలకు ఆరు నెలల ముందు అంగన్వాడీ వర్కర్లకు, మినీ అంగన్వాడీ వర్కర్లకు, హెల్పర్ల జీతాలను పెంచిందని పేర్కొన్నారు. గత ప్రభుత్వం హయాంలో 2019 వరకూ అంగన్వాడీ కార్యకర్తలకు సగటున రూ.6,950లు, అంగన్వాడీ సహాయకురాలికి, అలాగే మినీ అంగన్వాడీ కార్యకర్తలకు సగటున రూ.3,900 మాత్రమే చెల్లించిందన్నారు.వైసిపి ప్రభుత్వం వచ్చిన వెంటనే మేనిఫెస్టోలో ఇచ్చిన వాగ్దానానికి కట్టుబడి అంగన్వాడీ వర్కర్ల జీతాలను రూ.11,500లకు, మినీ అంగన్ వాడీ జీతాలను రూ.7,000కు, అంగన్వాడీ హెల్పర్ల జీతాలను రూ.7,000కు పెంచామని తెలిపారు. ప్రభుత్వం వచ్చిన మరుసటి నెలనుంచే ఈ జీతాలు అమల్లోకి తెచ్చి అంగన్వాడీ అక్కచెల్లెమ్మల పట్ల చిత్తశుద్ధిని నిరూపించుకున్నాం అని అన్నారు.

రాష్ట్ర విభజన తర్వాత తొలిసారిగా ప్రమోషన్లు ఇచ్చి 560 గ్రేడ్- 2 సూపర్ వైజర్ పోస్టులను భర్తీచేసి అంగన్వాడీ లకు తోడుగా నిలిచింది వైసిపి ప్రభుత్వమని తెలిపారు. సూపర్వైజర్ పోస్టులకు పరీక్షలు రాసేవారి వయోపరిమితిని 45 ఏళ్ల నుంచి 50 ఏళ్లకు పెంచుతూ వారికి అనుకూల నిర్ణయం తీసుకున్నామన్నారు. దీంతో 9 ఏళ్లుగా ప్రమోషన్ల కోసం ఎదురుచూస్తున్న వారిలో ఎక్కువ మంది పోటీపడే అవకాశాన్ని కూడా ప్రభుత్వం కల్పించిందన్నారు. ప్రభుత్వం అమలు చేస్తున్న వివిధ సంక్షేమ కార్యక్రమాలకు అంగన్వాడీ కార్యకర్తలు, సహాయకులను అర్హులుగా గుర్తించి వారికి డైరెక్ట్ బెన్ఫిట్ (డీబీటీ) ద్వారా రూ.1,313 కోట్లు అందించామని పేర్కొన్నారు. నవరత్నాలు కార్యక్రమంలో భాగంగా ప్రభుత్వం అమలు చేస్తున్న జగనన్న విద్యా దీవెన, వైఎస్సార్ ఆసరా, వైఎస్సార్ రైతు భరోసా, జగనన్న వసతి దీవెన, వైఎస్సార్ ఆరోగ్య శ్రీ తదితర పథకాలను వారికి వర్తింప చేస్తోందన్నారు. రూ.85.47 కోట్లతో 56,984 స్మార్ట్ ఫోన్లు కొనుగోలు చేసి అంగన్వాడీ లకు అందించామన్నారు. డేటా ఛార్జిలను కూడా రాష్ట్ర ప్రభుత్వం భరిస్తుందని తెలిపారు. డేటా కోసం ఏడాదికి రూ.12 కోట్లు చెల్లిస్తోందని వెల్లడించారు.

నాడు – నేడు కార్యక్రమాల ద్వారా స్కూళ్లలో మౌలిక సదుపాయాలు కల్పిస్తున్న ప్రభుత్వం అంగన్వాడీల్లో కూడా మంచి వసతులు, కనీస మౌలిక సదుపాయాలు ఏర్పాటు చేసే దిశగా ముందుకు సాగుతుందని పేర్కొన్నారు. గర్భవతులకు, బాలింతలకు, పిల్లలకు గతంలో మాదిరిగా వండి ఇచ్చే ఇబ్బంది లేకుండా హోం రేషన్ పద్ధతిని ప్రభుత్వం అమల్లోకి తీసుకువచ్చామని వెల్లడించారు. అద్దెభవనాల్లో ఉన్న అంగన్ వాడీ సెంటర్లకు రూ.66.54కోట్ల నిధులను మంజూరు చేయడం చేశామని తెలిపారు. అంగన్వాడి కేంద్రాల్లో పరిశుభ్రత కోసం అవసరమైన చీపుర్లు, బకెట్లు, మగ్గులు, ఫినాయిల్, సబ్బులు, స్టేషనరీ లాంటి అవసరాలను తీర్చడానికి 55,607 సెంటర్లకి రూ.7.81కోట్ల నిధులను మంజూరు చేశామని పేర్కొన్నారు. రూ.3,000/- చొప్పున రూ.6.36 కోట్ల నిధులను అంగన్వాడీ కార్యకర్తలే కేంద్రం యొక్క అవసరమును బట్టి ఖర్చు చేసుకునే వీలు కల్పించామని పేర్కొన్నారు. రాష్ట్రంలో 62 ఏళ్లు నిండిన అంగన్వాడీ వర్కర్లకు రూ.1 లక్షకు మరియు హెల్పర్లకు రూ. 40,000 లకు పెంచుతూ సర్వీస్ ముగింపు ప్రయోజనాలను అందించాలని G.O.MS.No: 47 తేది 20.12.2023 ద్వారా ప్రభుత్వం ఉత్తర్వులు జారీ చేశామని వెల్లడించారు.

Leave a Reply

Your email address will not be published. Required fields are marked *